ಪ್ರವಾಸವೆಂಬ ಅರಿವಿನ ಯಾತ್ರೆ!

ಪ್ರಕೃತಿಯನ್ನೇ ಸಂಪರ್ಕ ಕೊಂಡಿಯಾಗಿಸಿಕೊಂಡು, ಕೇವಲ ಮರಗಳ ಬೇರುಗಳಿಂದ ನಿರ್ಮಿಸಿರುವ, ನೂರಾರು ವರ್ಷಗಳಷ್ಟು ಹಳೆಯದಾದರೂ ಸಧೃಡವಾಗಿ ಚಾಲ್ತಿಯಲ್ಲಿರುವ, ಮೇಘಾಲಯದ ಲಿವಿಂಗ್ ರೂಟ್ ಬ್ರಿಡ್ಜ್ ನೋಡುವಾಗ, ಯಾವ ಕ್ಷಣಕ್ಕಾದರೂ ಮೈಮೇಲೆ ಬಂಡೆಕಲ್ಲುಗಳು ಉರುಳಬಹುದಾದ, ಕಡಿದಾದ ಹಾದಿಗಳ ಮಧ್ಯೆ ಪ್ರಯಾಣ ಬೆಳೆಸಿ, ಹಿಮಾಲಯ ಶಿಖರದ ಮಧ್ಯೆ ಇರುವ ದೇವಭೂಮಿ ಬದರಿಯ ತಲುಪಿದಾಗ, ಹಿಮಾಲಯದ ಶೃಂಗಗಳಿಂದ ಬೀಸುವ ಶೀತಗಾಳಿ, ಜಿಟಿಜಿಟಿ ಮಳೆ, ಕೊರೆವ ಚಳಿಯ ಮಧ್ಯೆ, ಪ್ರತಿ ಉಸಿರಿನ ಪ್ರಾಮುಖ್ಯತೆ ಅರಿವಾಗುವಂತಹ ಚಾರಣ ಮಾಡಿದಾಗ, ರಾಜಸ್ಥಾನದ ಯಾವುದೋ ಒಂದು ಗಲ್ಲಿಯಲ್ಲಿ, ಹಿರಿಯ ಜೀವವೊಂದು ಕಾಮೈಚಾ ವಾದ್ಯವನ್ನು ಇಂಪಾಗಿ ನುಡಿಸುತ್ತಿದ್ದರೆ, ಅದ ಕೇಳಿ ಉರಿ-ಬಿಸಿಲು ಸೆಕೆ-ಸುಸ್ತು ಯಾವುದೂ ತೋಚದಂತೆ ಮೈಮರೆತು ಹೋದಾಗ, ಭಾಷೆ ಬಾರದ ಊರು ಬಾಲಿಯಲ್ಲಿ ಆಗ ತಾನೇ ಕಲಿತ ಪದಗಳ ಬಳಸಿ, ಜನರೊಂದಿಗೆ ಮಾತನಾಡುತ್ತಾ, ಬಾಡಿಗೆ ಸ್ಕೂಟರ್ ತೆಗೆದುಕೊಂಡು ಊರೆಲ್ಲ ಸುತ್ತಿದಾಗ, ಭಾರತದ ತುತ್ತತುದಿಯಲ್ಲಿ ಕನ್ಯಾಕುಮಾರಿಯ ಅಂಚಿನಲ್ಲಿನ ಸಮುದ್ರ ತೀರದೆಡೆ ನಡೆದು, ಸಕಲ ಜೀವಿಗಳಲ್ಲಿಯೂ ಜೀವ ತುಂಬುವ ಭಾಸ್ಕರನಿಗೆ ಸೂರ್ಯನಮಸ್ಕಾರದೊಂದಿಗೆ ಕೃತಜ್ಞತೆ ಹೇಳುವಾಗ, ನೇಪಾಳದ ಪಶುಪತಿನಾಥ ದೇವಾಲಯದ ಪಕ್ಕದಲ್ಲಿರುವ ಅಂತ್ಯಕ್ರಿಯೆ ಘಾಟ್‌ನಲ್ಲಿ ಸಂಜೆ ಕುಳಿತು ಮೃತರ ಕೊನೆಯ ಪಯಣ, ಕುಟುಂಬದವರಿಂದ ಅಂತಿಮ ವಿದಾಯ ನೋಡುವಾಗ, ಲೋಣಾವಲಾದಲ್ಲಿ ರಸ್ತೆ ಬದಿಯ ಪಾವ್‌ಬಾಜಿಯ ಸವಿಯಲ್ಲಿ ಮುಳುಗಿ ಹೋದಾಗ, ತಿರುಪತಿಯ ಲಡ್ಡುವಿಗೆ ಕ್ಯೂ ನಿಂತು ಪಡೆದು ತಿಂದಾಗ, ಗೋಕರ್ಣದ ದೇವಸ್ಥಾನದಲ್ಲಿ ಕಳೆದು ಹೋಗಿ, ಒಂದು ಗಂಟೆಯ ನಂತರ, ದೇವಸ್ಥಾನದ ಗರ್ಭಗುಡಿಯಲ್ಲಿ ಗಂಧ ತೇಯುತ್ತಾ ಕುಳಿತ ಪೋರಿಯಾಗಿದ್ದೆ ಎಂದು ಮಗಳಿಗೆ ನನ್ನ ಬಾಲ್ಯದ ಕಥೆ ಹೇಳುವಾಗ, ಬೆಳಗಿನ ಜಾವ ನಾಲ್ಕು ಘಂಟೆಗೆ ಎದ್ದು, ತೀಸ್ತಾ ನದಿಯ ಹತ್ತಿರದ ನಿವಾಸಿಗಳಾಗಿ, ನೆರೆ ಬರುವಾಗ, ಊರಿಗೆ ಊರೇ ಎತ್ತಾವಳಿಯಾಗಿ, ಆಗ ತಾನೇ ಹುಟ್ಟಿದ ಹಸಿಗೂಸನ್ನು ಎತ್ತಿಕೊಂಡು ಗುಳೆ ಹೋಗಬೇಕಾಗುವ ಪರಿಸ್ಥಿತಿಯ ಕಥೆಗಳನ್ನು ಸಿಕ್ಕಿಂನ ಡ್ರೈವರ್ ಇಂದ ಕೇಳುವಾಗ, ಧರ್ಮಸ್ಥಳಕ್ಕೆ ಹೋಗುವ ಬಸ್ಸಿನಲ್ಲಿ ಕುಳಿತು, ತರಕಾರಿ ಮಾರುವ ಅಪ್ಪನೊಬ್ಬ, ತನ್ನ ಮಗುವಿನ ಹಣೆಗೆ ಮುತ್ತಿಕ್ಕಿ ತಕ್ಕಡಿಯ ಪಕ್ಕದ ಗೋಣಿಚೀಲದ ಮೇಲೆ ಮಲಗಿಸಿಕೊಂಡು ಬಿಸಿಲು ಮುಖಕ್ಕೆ ಹೊಡೆಯದಂತೆ ತಾನು ಅಡ್ಡಲಾಗಿ ಕುಳಿತುಕೊಳ್ಳುವ ಮಮಕಾರ ಕಾಣುವಾಗ, ಕಾಳಹಸ್ತಿಯ ಮೂಲೆಯ ಪುಟ್ಟ ಮನೆಯೊಂದರಲ್ಲಿ, ಹೆಂಗಸರೆಲ್ಲ ಸೇರಿ ಹಾಡಿಕೊಂಡು, ಸುಪ್ರಸಿದ್ಧ ಕಲಂಕಾರಿ ಚಿತ್ತಾರಗಳನ್ನು, ಬಿದಿರಿನ ಕುಂಚದಿಂದ ಬಣ್ಣಗಳ ಸೀರೆಗೆ ಇಳಿಸುವ ಕಲಾತ್ಮಕತೆಯನ್ನು ಕಣ್ತುಂಬಿಕೊಂಡಾಗ, ಪ್ರವಾಸೋದ್ಯಮವೇ ಹೊಟ್ಟೆಪಾಡಾದ ಡಾರ್ಜೀಲಿಂಗ್ನಲ್ಲಿ, ಒತ್ತಿಕೊಂಡು ಪಟ್ಟಣವನ್ನು ಕಟ್ಟಿಕೊಂಡು, ನಿಸರ್ಗವನ್ನು ಬಗೆದು ಕಸದ ಬುಟ್ಟಿಯನ್ನಾಗಿ ಮಾಡಿಕೊಂಡ ಬಗೆಗೆ ವ್ಯಥೆ ಪಟ್ಟುಕೊಂಡಾಗ, ಜಬರ್ದಸ್ತ್ ಬಟ್ಟೆ ಎಂಬ ಮಾರಾಟಗಾರನ ಬಣ್ಣದ ಮಾತಿಗೆ ಮರುಳಾಗಿ, ಚೆಂದದ ಬಟ್ಟೆ ತಂದು, ಮರುದಿನವೇ ಅದು ನೆನೆಸಿದ ನೀರಿನ ಬಕೇಟಿನಲ್ಲಿ ಬಣ್ಣವನ್ನೆಲ್ಲ ಬಿಟ್ಟು ಕೊಟ್ಟ ಬೆಲೆಗೆ ಮೋಸ ಹೋಗಿ ಮುಖ ಪೆಚ್ಚಾದಾಗ.. 

ನನಗೆ ಅನಿಸುವುದು, ಈ ಪ್ರವಾಸ ಎಂಬುದು ನಾವು ಪಠ್ಯ ಪುಸ್ತಕದಲ್ಲಿ ಓದದ, ಟಿವಿಯಲ್ಲಿ ಕಾಣದ, ದಿನನಿತ್ಯಕ್ಕೆ ಕಾಣಸಿಗದ ಅದೆಷ್ಟು ಬಗೆಯ ಜೀವನದ ಅನುಭೂತಿಗಳನ್ನು, ಕೌಶಲ್ಯಗಳನ್ನು, ಅನುಭವದ ಮೂಲಕ ತೋರಿಸಿಕೊಡುತ್ತದೆ ಎಂದು!