ಕಾದಂಬರಿ ಲೋಕದಲ್ಲಿ ಶುಕ್ರದೆಸೆ

ಹಿರಿಯ ವಿದ್ವನ್ಮಣಿಗಳಾದ ಶ್ರೀ ಶ್ರೀಧರ ಡಿ.ಎಸ್ ಅವರು ಯಕ್ಷಗಾನ ಕ್ಷೇತ್ರದ ಎಲ್ಲ ವಿಭಾಗಗಳಲ್ಲೂ ಸಾರ್ಥಕ ಸೇವೆಯನ್ನು ಮಾಡಿ ಸೈ ಎನಿಸಿಕೊಂಡವರು. ಅವರ ಬಹುಕಾಲದ ಅಧ್ಯಯನ-ಅಧ್ಯಾಪನಗಳ ಫಲವೆಂಬಂತೆ ಪ್ರಸಿದ್ಧ ಪುರಾಣಪಾತ್ರವಾದ ಶುಕ್ರಾಚಾರ್ಯರ ಜೀವನದ ಮೂಲಚೂಲಗಳನ್ನು ಸಮೀಕ್ಷಿಸುವ ಪೌರಾಣಿಕ ಕಾದಂಬರಿ ‘ಅಸುರಗುರು ಶುಕ್ರಾಚಾರ್ಯ’ವು ಮೂಡಿಬಂದಿದೆ. ಭೃಗುಕುಲತಿಲಕನಾದ ಶುಕ್ರಾಚಾರ್ಯನು ಜನಸಾಮಾನ್ಯರಿಗೆಲ್ಲಾ ಒಂದು ರೀತಿಯ ಋಣಾತ್ಮಕ ವ್ಯಕ್ತಿತ್ವವಾಗಿ ಮಾತ್ರವೇ ಕಂಡಿರುವುದು. ಅದಕ್ಕೆ ಕಾರಣವೂ ಇದೆ; ಆತನ ಮುಂಗೋಪ, ಅಸುರಗುರುತ್ವ ಮತ್ತು ಪಕ್ಷಪಾತ, ಸ್ವಭಾವದಲ್ಲಿರುವ ರಾಜಸ ಗುಣ, ಸುರೆ ಕುಡಿಯುವ ದೌರ್ಬಲ್ಯ, ಬಲಿಗೆ ದಾನ ನೀಡಲು ಬಿಡದೆ ಒಕ್ಕಣ್ಣನಾದ ಎಂಬ ಕತೆಗಳೆಲ್ಲ ಕೂಡಿ ಒಂದು ಪೂರ್ವಗ್ರಹದ ಚಹರೆಯು ನಮ್ಮೊಳಗೆ ನಿಂತುಬಿಟ್ಟಿದೆ. ತಪಸ್ಸಿನಲ್ಲಿದ್ದ ವಿಶ್ವಾಮಿತ್ರ ಮೇನಕೆಯ ಬಲೆಗೆ ಬಿದ್ದ, ವಸಿಷ್ಠರ ವಿರುದ್ಧ ತೊಡೆತಟ್ಟಿ ಮಕ್ಕಳನ್ನೆಲ್ಲ ಕೊಂದು ಹಾಕಿದ ಎಂಬುವ ವಿಷಯಗಳನ್ನೇ ಗುನುಗುತ್ತಿದ್ದ ಜನಗಳು, ಅವನೇ ಗಾಯತ್ರಿಯ ಸಾಕ್ಷಾತ್ಕಾರಕ್ಕೂ ಕಾರಣನಾದವನೆಂಬ ಹಿರಿದಾದ ಸತ್ಯವು ಮುನ್ನೆಲೆಗೆ ಬಂದು ಗಟ್ಟಿಯಾದುದು ದೇವುಡುರವರ ಮಹಾಬ್ರಾಹ್ಮಣ ಕಾದಂಬರಿ ಬಂದ ನಂತರ. ಅಂತೆಯೇ ಶುಕ್ರನ ಸಾಹಸ, ಪುರುಷ ಪ್ರಯತ್ನದ ಪರಾಕಾಷ್ಠೆಯಿಂದ ಶಿವಪುತ್ರನೇ ಆಗುವ, ಅಸುರರನ್ನು ದೇವತ್ವಕ್ಕೇರಿಸಲು ಹೆಣಗುವ, ಅವರ ಉದ್ಧಾರಕ್ಕೆ ಸಮರ್ಪಿತವಾಗುವ ಜೀವನವನ್ನು ಉಜ್ವಲವಾಗಿ ಶ್ರೀಧರರವರು ಚಿತ್ರಿಸಿದ್ದಾರೆ. ಯುಗ ಯುಗಗಳನ್ನು ಮೀರಿ ಬೆಳೆದು ಬಾಳಿದ ಆ ಪುರಾಣಪುರುಷನು ನಮ್ಮಿಂದ ಎಷ್ಟೋ ದೂರದಲ್ಲಿ ಬೆಳಗುತ್ತಿರುವ ಗ್ರಹಾಧಿಪತಿ ಶುಕ್ರನಾಗಿ ಕಾದಂಬರಿಯ ಎಲ್ಲ ದಿಕ್ಕುದೆಸೆಗಳಲ್ಲಿ ವ್ಯಾಪಿಸಿದ್ದಾನೆ.