ಇದೇ ಆರಂಭದ ಹಕೀಕತು

ನಮ್ಮೆಲ್ಲರ ಅಸ್ತಿತ್ವದ ಆದಿಯಿಂದಲೂ

ಅಮ್ಮನೊಡಲಲ್ಲಿ, ಸಾವಿರ ವೀರ್ಯಗಳ ಹಿಂದಿಕ್ಕಿ

ನೆಮ್ಮದಿಯ ಮಡಿಲ ಸೇರಲು,

ಗುಮ್ಮನೊಡನೆಯೂ ಹೋರಾಟವೇ

ನಮ್ಮಿಷ್ಟದ ಆಟಕ್ಕೂ ಊಟಕ್ಕೂ,

ತಮ್ಮ ತಂಗಿ ಅಣ್ಣ ಅಕ್ಕ ಅವರನ್ನೂ ಬಿಡದೆ,

ಸುಮ್ಮನಿರಲಾಗದೇ, ಮಾಡುತ್ತಲೇ ಬಂದಿದ್ದೇವೆ ಯುದ್ಧ!

ಎತ್ತ ಹೋದರತ್ತ ಕಾದಾಡುತ್ತೇವೆ ಈಗಲೂ

ನೆತ್ತರುಕ್ಕಿಸುವ ಗಡಿಗಳಲ್ಲಿ, ಯೋಧರ ಬಲಿಯಿಕ್ಕಿ

ಇತ್ತಲಿಂದಾಚೆಗೆ ನೆಲವ ಪಡೆಯಲು,

ಹೊತ್ತ ಇಳೆಗೂ ಬೇಲಿ ಹಾಕುವುದೇ?

ಬತ್ತದ ಬಯಕೆ ಅಧಿಕಾರಕ್ಕೂ ಐಶ್ವರ್ಯಕ್ಕೂ

ಮತ್ತಿನ್ನು ಆಪರಿಯ ದುರಾಸೆಯ ತೊಲಗಿಸದೆ, 

ಕಿತ್ತೊಗೆಯಲಾರದೇ, ಮಾಡುತ್ತಲೇ ಬಂದಿದ್ದೇವೆ ಯುದ್ಧ!

ಕಿಚ್ಚು ಹಚ್ಚಿಕೊಳ್ಳುತ್ತೇವೆ ಚಿತ್ತಕ್ಕೆ ಯಾವಾಗಲೂ

ಹುಚ್ಚೆದ್ದು ಕುಣಿದ ಮನ ಅತ್ತಿದ್ದೂ ಇದೆ ಬಿಕ್ಕಿ ಬಿಕ್ಕಿ

ಬೆಚ್ಚಗಿಡದೇ ಬೆಚ್ಚಿಸುವ ಸೋಲು,

ಮೆಚ್ಚಿದ್ದೆಲ್ಲವ ನೀಡುವ ಗೆಲುವೇ ಒಲವೇ?

ಹೊಚ್ಚಹೊಸದೇನಲ್ಲ, ರಾಮನಾಡಿದ್ದಕ್ಕೂ ಪಾರ್ಥನಾಡಿದ್ದಕ್ಕೂ, 

ಮುಚ್ಚಿಡಲಾಗದ ಆಂತರಿಕ ದ್ವಂದ್ವ ಎಡೆಬಿಡದೆ, 

ಕೊಚ್ಚಿಹಾಕಲಾರದೇ, ಮಾಡುತ್ತಲೇ ಬಂದಿದ್ದೇವೆ ಯುದ್ಧ!